Rrugës së suksesit

 Jeta e kësaj bote është një përjetim i shkurtër dhe mashtrues, e mos u mashtro të zotërosh ç’ka aty, por merr vetëm atë që të nevojitet; do të kesh shumë! 

Konsideroje veten të rëndësishëm! Ti je i rëndësishëm vetëm atëherë kur mendon dhe ndihesh i rëndësishëm. Pse të mos ndihesh i rëndësishëm, kur Zoti yt të ngriti mbi shumë krijesa të Tij?! Ti në botën e panjohur je më i fuqishëm se vetë kodrat; ty t’u besua diçka që shumë krijesa më të fuqishme u përulën të paafta për të marrë përgjegjësinë mbi supet e tyre. Po, ti je i rëndësishëm, sepse Allahu të dhuroi fuqi shpirtërore, mendore dhe fizike. Mbi të gjitha, mendjes dhe zemrës sate i dhuroi shkëndijë udhëzimi!

Je i rëndësishëm! Nuk ke as arsyen më të vogël të ndihesh i mangët; mbi të gjitha, je krijesë e të Plotfuqishmit, të Gjithëpushtetshmit, Allahut. Drejtoju me lutje duke u shërbyer me dhuntitë e Tij ndaj teje dhe vërtet do ndiesh madhështinë e Allahut në rëndësinë e ekzistencës sate.

Pse të mos ndihesh i rëndësishëm, kur Krijuesi nënshtroi për ty gjithçka në tokë?! Shërbehu me to që të ndihesh i rëndësishëm! Ji falënderues! Uji - pa të cilin nuk ka jetë -  mund të jetë i rëndësishëm për ty, por prapë ti je më i rëndësishëm, sepse uji u krijua për të qenë në shërbimin tënd. Sa i rëndësishëm që je dhe… ende s’e ke kuptuar!

Për ta kuptuar më mirë rëndësinë e të qenit njeri, merr shembullin e njerëzve të mëdhenj muslimanë, e do ta marrësh vesh se për qenien njerëzore të udhëzuar gjithçka që e rrethon është në shërbim të dobishëm për të.

Përcaktohu se kush do të jesh! Ti nuk mund të arrish të realizosh diçka në jetën tënde përderisa nuk përcaktohesh se kush do të jesh. Bëj zgjedhjen. Je i lirë. Para se të bësh zgjedhjen, mendo e analizo se me atë zgjedhje kush do të ishe, pastaj rrekju punës pasi t’i drejtohesh Zotit tënd me lutjen: O Zoti im! Nëse është në të mirën e jetës sime dhe të jetës së amshueshme, më forco! E nëse jo, më udhëzo për më të mirën për veten time! Mbështetu në udhëzimin e Allahut, e pastaj bëj atë që duhet. Mos vështro se ç`thuhet.

Mendo dhe vepro vetëm për sot! Sa më i afërt e konkret të jetë objektivi për të cilin mendon a punon, aq më i lehtë është shijimi i fryteve të mendimit dhe punës tënde. Mos hidh hapa të gjatë, pasi këmbët i ke afër trupit. Përderisa Zoti yt nuk të ngarkoi përtej mundësive, atëherë dhe ti mos i tejkalo mundësitë e tua. Kur e kupton këtë, arrin gjithçka ke ndërmend.

Kur’ani na edukon se “jeta e kësaj bote është një përjetim i shkurtër dhe mashtrues”, e mos u mashtro të zotërosh ç’ka aty, por merr vetëm atë që të nevojitet. Do të kesh shumë. Ndërkaq, i Dërguari i Allahut (salAllahu alejhi ve selem) na mësoi se “njeriut në këtë jetë do t’i mjaftonte sa plaçkat e një udhëtari”, që ti të jesh i qetë të mendosh dhe të veprosh, e për qëllimin e misionin tënd të jetosh gjersa ta takosh Allahun Fuqiplotë.

Zbulo botën tënde të brendshme dhe merru me të! Sekreti i personalitetit tënd qëndron në aftësinë për të zbuluar karakteristikat, qofshin pozitive a negative të vetvetes tënde. Njohja e vetvetes, shfrytëzimi i anëve të ndritshme dhe minimizimi i anëve të errëta janë pikënisje e ndërtimit të personalitetit tënd. Ti je vetvetja dhe vetëm ti mund ta zbulosh atë, duke qenë nën hijen e Fjalës së Allahut dhe Traditës së Muhammedit (alejhi selam).

Vëllazërohu me atë që ka të njëjtat ide dhe dëshira! Ti ke nevojë për përkrahje. Nuk mund të realizosh atë që mendon a dëshiron nëse vepron individualisht, por të duhen të tjerë, që kanë të njëjtat ide dhe dëshira. Derisa të arrish të vëllazërohesh me të tjerë në ide dhe dëshira, dije se duhet të forcosh besimin në vetvete, të përcaktohesh se kush do të jesh, të mendosh e veprosh me objektivizëm, dhe ta kesh njohur botën tënde të brendshme.

E kështu, do jesh realist dhe optimist, në dashtë Allahu!

 ◄ Mëparshme                   Tjetra ►